Kumusta na, sana'y maging matatag ka
Kung kalooban mo'y bumabagsak, ang Pilipinas ay paano na
Upang maibsan ay nakasalalay sa iyo ang pinagdaraanang sakuna
Kaya't sa iyong tapang at dedikasyon, kami ay lubos na humahanga
Ipagpatawad mo ang ibang mga kababayang hindi marunong umunawa
Imbes ika'y pasalamatan masamang bagay kanila pang ginagawa
Hindi ba nila alam na ikaw ang siyang tunay na dakila
Haharapin ang kalaban kahit na hindi man nakikita
Sa mga nars at doktor kami ay saludo sa inyo
Hindi matutumbasan ang lahat ng hirap na ngayo'y pinagdaraanan n'yo
Sakit man na kumakalat ay tunay na sadyang bago
Ginagawa niyo lahat ng makakaya magamot lamang lahat ng dinapuang tao
Marami na sa hanay n'yo ang nagbuwis ng buhay
Sa tungkulin ay hindi tumalikod at buong pusong umalalay
Ang pagtulong niyo ay wagas maisalba lamang ang buhay
Pandemik na ito'y magwawakas ngunit kayo ay nakatatak sa aming isipan habambuhay
Sa mga sundalo at pulis na patuloy na nagbabantay
At hindi napapagod magpaalala lalo na sa mga pasaway
Salamat sa inyong serbisyong hindi rin naman matatawaran
Upang ang pandemik na ito ay tuluyan nang maibsan
Lahat ng mamamayan kayo ngayon ang sandigan
Kami'y nagtitiwala na covid 19 ay ating malalampasan
Sa pagtutulungan maaabot natin ang kinabukasan
Upang magbalik sa normal ang takbo ng bawat nating kabuhayan
Bayanihan na likas sa mga Pilipino ngayon ay ating nakikita
Sa panahon ngayon walang maliit o malaking tulong sa ating mga mata
Nagbigay ka man o nanatili lamang sa loob ng iyong tahanan
Ito'y malaking tulong na para sa frontliners at para sa bansang ating sinilangan
Sa lahat ng frontliners, gabayan nawa kayo ng Poong maykapal
Kami ay nakasuporta at palagi kayong ipagdarasal
Na 'wag mahawa't bigyan kayo ng malakas na pangangatawan
Upang ang liwanag ng bukas ay ating makamit at ang tagumpay ay sama-sama nating makamtan
No comments:
Post a Comment